لا يتحمّل موقع البرونزية النسائي أيّة مسؤوليّة عن المواد الّتي يتم عرضها أو نشرها في الموقع

~~!؛"؛!اقــــدار الزمــــان!؛"؛!~~ · 06-01-2010, 08:03 PM

حبيت انقل لكم الروايه مع حفظ حقوق كاتبها..

تمنياتي لمن يستمتع بها ويرغب ان ينقل ان يكتب اسم الناقل لكي لاتتعلق بذمتي,,

*********************

.. الله يهنيني ..

للكاتب : Guevara

اقدم لكم روايتي الاولى اللتي اسميتها * الله يهنيني* اقدم في ثناياها واقعي الذي عايشته .. من مجتمعي السعودي الاصيل قصدت به الطبقه المتوسطه اللتي انا اول من يمثلها .. تلك الطبقه البسيطه اللتي تقاوم مصاعب الحياه تكد وتتعب وتكدح من اجل لقمة عيش شريفه بعيدا كل البعد عن الطبقه المخمليه اللتي اسهبها الزملاء الروائيون بكثير من الطرح .. طبقة الاحلام الورديه واللتي وان كانت متواجده لاتتجاوز 30% من مجتمعنا .. فالكم الهائل الذي نراه في وسائل الاعلام مرئيا اومقروء خاصة المرئي .فلا تجد مسلسلا خليجيا الا واظهرنا وكاننا اقل فرد يمتلك

قصور وسيارات فخمه وشركه لها وزنها بالسوق وخلافه .. اضف الى ذلك انعدام

مناقشة هموم المجتمع السعودي والخليجي الحقيقيه وطرح المقترحات والوسائل لعلاجها وتلافيها بالمستقبل .. قد يقول شخص ما مادخل المسلسلات والافلام في الموضوع ..فاجيبه انه قبل ان يكون مسلسل او فيلم كان قصه وسيناريو وحوار وهو دور الروائي بلاشك فنرجو من الجميع الكتابه بواقعيه وطرح منطقي وليس وكانني اقرى روايه سعوديه ولا اراها بالواقع هذا ماحببت ان اوضحه وعذرا على الاطاله ..

روايتي هذه احببت ان اطرح فيها الحب العفيف الشريف بين الرجل والمراه في مجتمعنا .. عن مصاعب الحياه وهمومها .. الصبر على الواقع وان غدا بناظره لجميل .. والكثير بين ثنايا القصه ..

^

التعريف بابطال القصه :

( خالد وسلطان اخوان)

خالد (ابوفهد)

متوفي..

ام فهد (ساره):

45 سنه ..

-

فهد : موظف بالامن العام

بمركز الشرطه وتعليمه وصل

الى الثانويه العامه وتوقف لمساعدة

اهله ويكون من يصرف عليهم ..

25 سنه..

-

تركي : يدرس بالجامعه سنه ثالثه

له الان تخصص رياضيات ..

21 سنه ..

-

شذى وندى : توام روعه مالين عليهم

البيت ومسوين جو حلو اخر

سنه ثانويه عامه ..

18 سنه ..

-

حلا : اول ثانوي بنت هاديه جدا عكس

خواتها 180 درجه شخصيتها عجيبه

شوي نكتشفها مع القصه ..

16 سنه ..

هند : اول سنه جامعه تدرس

ادب انجليزي ويا رغد بنت سعد

وهن صديقات حيل ..

20 سنه ..

---------------------------------------------------------------------------

سلطان (ابوفيصل)

متقاعد من الحرس الوطني وشغال

اعمال حره شخص قمه بالحنان مع

عيال اخوه واهل بيته ..

58سنه ..

-

العنود ( ام فيصل)

الام المثاليه وقلب مافيه اطيب منه

وتشترك ويام فهد بكثير من

الصفات ماعدا انهاعصبيه وام فهد

تعالج الامور بحكمه ..

52 سنه ..

-

فيصل: موظف بالاحوال المدنيه

شخص يعتمد عليه عزوبيته غاليه

عليه كثير ..

28 سنه ..

-

سعود : بالدراسه صفرعلى الشمال

فقرريدخل مع فهد الامن العام وهم

بمركز واحد وزي الاخوان ..

26 سنه ..

-

هدى:تدرس بالجامعه والسنه هاذي

اخرسنه رياض اطفال ..

22 سنه ..

-

هند : اول سنه جامعه تدرس

ادب انجليزي ويا رغد بنت سعد

وهن صديقات حيل ..

20 سنه ..

انساب خالد و سلطان

سعد (ابو مشاري) :

اخو ساره واللي متزوجه خالد

شغالين سوى بتجارةالماشيه وسعد لازال ..

55 سنه ..

-

فاطمه (ام مشاري):

الزوجه والام الرائعه ووقفت بجانب

زوجها باصعب الظروف ..

50 سنه ..

-

الهنوف: اخت سعد من ابوه وتشتغل

معلمة تربيه فنيه ,, وخالة عيال خالد ..

23 سنه ..

-

مشاري : معلم بمدرسه ابتدائيه ومتزوج

من بنت عبدالله (مها )وعنده ولد اسمه

احمد ومرته حامل ..

30 سنه ..

-

هديل : معلمة بالروضه واربع وعشرين

ساعه مناقر ويا الهنوف وهن تقريبا زي

الخوات .

24 سنه ..

سلمان : لسا متخرج من الجامعه متاخر

وتخصصه ادارة اعمال والولد تفكيره

تجاري بحت ..

23 سنه ..

-

رغد : وتدرس ادب انجليزي كما اسلفنا

ويا هند ,وهي بنت شخصيتها حلوه حيل ..

20 سنه ..

عبدالله (ابو خالد) :اخوالعنود

ومتقاعد من وزارة الزراعه و

شغال الحين اعمال حره ..

60 سنه ..

-

تهاني ( ام خالد ) :كانت لها

مشاكل سابقه مع العائله اما

الحين لا , خلاص سمن على

عسل .. مابقى بالعمر كثر

راح .. (*_^)

55 سنه ..

-

مها : ربة منزل ومتزوجه من

مشاري كما اسلفنا

30 سنه ..

-

خالد :موظف في مكتب العمل

ومملك على هدى بنت خالته..

26سنه ..

-

نوف : متخرجه من الجامعه

وتخصصها فنون جميله وما

تشتغل ..

24 سنه ..

-

سامي : عاطل عن العمل

متخرج متاخرتقريبا له سنه

ولد مهوي على الاخر ..

22 سنه ..

في بيت ابو خالد <<<

اصوات وازعاج جايه من الملحق هيييييييييييييييييييييييييييييييييييي قوووووووووووووووووووووووووووووووول هيييييييييييييييييييييييي واخيرااااااااااااا جابها المفرج جابها والله هيييييييييييييييييييه

تركي : بتحبوووووووووووووووووو مييييييييييييييييييين

الشباب: هلاااااااااااااااااااااااااااااااااااااااااااااااا اااااااااااااااااااااال

توضيح ( كانوا الشباب يتابعون مبارة الهلال والشباب على نهائي ولي العهد )

سعود:ياشباب سكوت الوضع مايطمن لسا الدقيقه 117 والله اني خائف ..

مشاري: والله من الحظ بس ..

خالد: حكى النصراوي والله ماهو منك من القهر..

مشاري : وش انقهر منه بالله على الاقل بطولاتنا ناخذها بالشرف , من غير لف ولادوران < للاسف اغلب النصراويين كذا مادري ليه ..... (^_^)

خالد: الحين من جاب طاري البطولات بالله هههههههههههههههههههه ..

مشاري واللي بدا يعصب : اصلا مستوى ومحترفين واداره حنا افضل منكم بس الحظ والتحكيم لاعب لعبته معكم < برضه اغلب النصراويه كذا (×_×) ..

خالد : يالنسيب لو كذا اكلتوا الاخضر واليابس .. بس الافضل باللي تقول هواللي يحقق بطولات وامجاد وانا ماشوف الا الازرق كذا .. بعدين لعنبوا بليسك اخر بطوله جبتوها يومك مراهق .. استح على وجهك وحول هلالي بس ..

مشاري اللي طلعتله قرون في راسه : عاد كيفي نصراوي وافتخر حنا العالمي حنا جمهور الشمس ..

خالد : ياخي والله انك صعبان علي وصعبان علي حمووودي اكثر منك والله اللي من اليوم نصر ونصر المباراه هلال وشباب وهو نصر نصر ..

مشاري : جا بيرد عليه الاوالشباب بصرخه واحده هييييييييييييييييييييييييييييييييه

انتهت المباراه وفاز الهلال .. مشاري : قاعد يتحرطم .. < اي / موعاجبه الوضع..

" قاموس Guevara للهجه المحليه ىالسعوديه .. صـ 79 ..

سامي وسلمان تركي وسعود > رقص وفله ..

الا وبدخلة فيصل عليهم : سلام عليهم ..

الشباب : وعليه السلام .. مبرووووووووووووووووووك

فيصل : الله يبارك فيك وبعدين ياخي محسومه ومنتهيه من البدايه ..

تركي : ياخي ياقلبك تروح العزيمه والهلال عالنهائي اليوم .

فيصل : وش اسوي فيكم كلكم مو رايحين والله فضيحه قلت ياولد تلحلح شوي وخذ الشيبان وروح .. الا وش عنده ابو الشباب مقفله معاه ..

سامي : والله مادري عنه بس يمكن للتاثيرات الخارجيه سبب ..

مشاري : قام وارسل المركى ! (×_×) على سامي وهو معصب ..

سامي : على هونك يالنسيب ههههههههههههههه ..

سعود : هههههههههههههه عن اذنكم بكلم برى شويات وارجع ..

فيصل : ياخي قايلك خلنا نروح وخلك من المباراه بس انت الله يهاديك .. اقول جب البلوت وخلنا ناخذ دورتين بس ..

مشاري : والله جبتها يالله اقرب ياتركي ..

تركي : اقول توكل بس مالعب مع اكبر غشاشين بالشرق الاوسط ,, تبوني العب بشرط .. ماتلعبون انت وفيصل سوى ...

مشاري : اقول طير يالله .. بتلعب والا بكيفك

على دخلة سامي : خلاص يابن الحلال انا بلعب انا وسلمان ..

فيصل : زين والله سهالات اجل ..

سلمان : وش قصدك ..

فيصل : قصدي ماعندكم سالفه ..

سامي : زين ان ماكسرنا راسك انت وميشو ..

مشاري : ميشو بعينك .. قل ابو احمد ياتعبان ..

سامي بعناد : ميشو ميشو ميشو ميشو > مثل البزران

مشاري : اقول الحمد لله والشكر بس ..

تركي : خلاص انا على التسجيله ..

مشاري : فتح عيونك اربع اربع عليه ترى مامن ثقه .. الرجال متقصدنا

تركي : زين نشوووف ..

شوي والاجواء حماس وبدخلة الشغاله ومعاها صينية حلا وفطاير ومكسرات ..

والقهوه والشاهي شغلات سهره يعني ..

مشاري : اما الفطاير هاذا شغل ام احمد الله يخليها لي ..

خالد : اما الحلا هذا ابداع نوف ..

وبدخلة سعود : الله يسلم يدين بنات خالتي كل هذا عشان الازرق فايز ..

مشاري : هذا عيبها الله يهاديها المشكله ان ام احمد هلاليه ..

خالد : اي والله واللي ضايع بينكم احمد ..

سامي : اي والله ولد اختي قاعد يعيش صراعات منزليه ..

خالد : حمودي انت قاعد تعيش صراعات ..

احمد واللي مايدري وش السالفه قاعد يهز راسه (^__^)

مشاري : احمد تعال خذلك فطيره بدل ماتسمع خوالك هالمهوين ..

العيال : ههههههههههههههههههههههههههههههههههههه

بمكان اخر وعند البنات :

هل الهلال وهلت افرح وامجاد والفوز تقرع في الملاعب طبوله

والصاله رجه فوق تحت والبنات قاعدين يردحوون ورقص ووناسه عالاخر ..

هدى : ام احمد يالله ..

مها : والله مافيني تعبانه .. من اليوم وانا اكرف بهالمطبخ .. احس لوتحركت حركه

وحده باولد الحين ..

هدى : لا يابنت الحلال كله الا تولدين الحين .. مافينا حيل ابد ..

مها : والله لو بيدي ولدت الحين وافتكيت ..

هدى : الله يعطيك العافيه ان شاء الله انتي بنص التاسع مو ..

مها : اي والله الله يعين .. بس كله يهون عشان البنوته ..

نوف اختها لجنبها : ياهالبنوته اكلت الجو علينا قبل لاتشرف على الدنيا ..

هديل : طبعا بما اني عمتها لازم تاكل الجو ..

نوف : لا حبيبتي عشان خالتها تاكل الجو عادي ..

هديل : عمتها ...

نوف : خالتها ...

هديل : عمتها ...

نوف : عمتها ...

مها : خير ان شاء الله بزران .. كلكون حلوين .. بس اللي بتاكل الجو عليه حمووودي ..

هدى : كلكون ههههههههههه شلون هاذي شامي والا لبناني والا شنو ...

مها : مدري مكس حوامل لاتدققين ...

البنات : هههههههههههههههههههههههههههههههههه

هند + رغد + الهنوف : طاحوا على الكنب تعبانات من الردحه ..

الهنوف : تعبانه من خاطر والله ..

رغد : اي والله ..

هند : بس الازرق يستاهل ..

مها : اي والله بيضوها اليوم ..

الهنوف : دوم مو يوم ..

والا بدخلة شذى وندى .. ومعهن سطل مويا حاره وفوط ..

البنات : خير ان شاء الله ..

شذى + ندى : لا بس تحسبا لاي طارئ ..

مها (ووجهها محمر) : هين اوريكن انا .. وتحذفهن < اي / القت عليهن

" قاموس Guevara للهجه المحليه السعوديه .. صـ 39 ..

بالمخده اللي كانت متسنده عليها ..

البنات : بضحكه وحده ههههههههههههههههههههههههههههههه

ام خالد ( واللي كانت مودعه العجز اللي بيروحن مع الشيبان بعد هالسهره

الحلوه وسمعت اللجه وجت للبنات ) : خير يابنا............ وبلمت < بلم / اي

اندهش او لم يستوعب باللهجه السعوديه " قاموس Guevara للهجه المحليه

السعوديه .. صـ 1239 ..

ام خالد : يما بنيتي مها وش فيك ..

(طبعا نرجع للمشهد .. مويا حاره + فوط + ومها جالسه ماهي مستنده على المخده وتقريبا شبه منسدحه > اي مستلقيه " قاموس Guevara للهجه المحليه السعوديه .. صـ 839 .. بعد ماحذفت البنات وحالة الرجلين " تم الحذف من قبل الرقابه " )

ام خالد : يما وش فيك حولك ولاده .. يانوف نادي مشاري بسرررعه ..

نوف : بس يمه ..

ام خالد : اقول بسرعه اها < لهجه تحذيريه " قاموس Guevara للهجه المحليه السعوديه .. صـ 1009 ..

مها : يمه هاذي شذى وندى يمزحن علي اانا مافيني شئ والله ..

ام خالد : اّاّاّاّه ياقلبي لا يا التسلبات خوفتني على بنيتي < طلع الصدق ..

البنات : ههههههههههههههههههههههههههههههههههههه

ام خالد : صدق يابنبتي مافيك شئ ..

مها : اي والله مافيني الا العافيه الحمد الله ..

حلا :كانت جالسه على اللاب توب صديقها الصدوق شوي بعيد عنهم وتتفرج

عليهم وتضحك معهم وعلى رجتهم ..

ام خالد : يمه وش فيك جالسه هناك ..

حلا : لا خالتي مرتاحه كذا قاعده اقرى لي روايه ..

ام خالد : الله يهاديك لايعميك هالي جالسه عليه اربع وعشرين ساعه .. < دايم امي مع امي كذا ..

حلا : ان شاء الله خالتي ..

ام خالد : يالله تصبحون على خير ..

البنات : وانتي من هل الخير ..

ندى برباشه: <اي / الاستعجال وعدم اخذ الحيطه والحذر " قاموس Guevara للهجه المحليه السعوديه .. صـ 679 ..

حلاوش قاعده تسمعين ؟ وقبل لاتجاوب حلا فصلت السماعات من الجهاز ..

ليصدح بــ"

حبيتك ياحبيبي من غير ماسأل سوال

وحاسهر ياحبيبي مهما طال المطال

انا بس اللي محيرني ومخلانيش انام

ازاي انا باسهر وازاي تقدر تنام

ندى : يوووووووووه وشهالغبار ..

شذى : والله جد قديمه مرررررررره ..

رغد : ساعات احس انك عجوز يابنت خالتي ..

حلا : خلصتوا .. بالله بس وش تبوني اسمع من فنانين جيلنا .. ذنوب على الفاضي

يمكن الموجودين الحين يعدون على الاصابع ..

الهنوف : ولاواحد من هالجيل عاجبك انا اللي اعرفه ان لونك رومنسي ..

حلا : على عيني وراسي ياخاله انا قلتك قليلين جدا ولايتعدون عشره ..

انا ابي اسمع غناء صادق من القلب للقلب .. فن عربي اصيل .. وين لحن قبل

كلمات قبل اصوات قبل اااااه بس ..وبعدين فييه فرق بين مطرب وفنان .. بين الطرب العظيم وقلة الحياء اللي صايره الحين .. اي واحد عاطل قال بصير فنان

يعني اللي يمثل الفن العربي الحين منو هيفاء وجواد العلي حمد لله والشكربس ..

البنات : سكتوا .. اول مره تتكلم حلا هالكثر .. ومتعجبين انها غير عن كثير من بنات جيلها ..

• خلونا نتكلم عن " حلا " شوي بهالجزء .. بنت هاديه جدا متفوقه دراسيا

عايشه حياتها بروقان اهتمامها بنفسها كبير ومطلعه جدا وقارئه نهمه تحب كثير الالوان الهادئه .. وزي ماسلفنا تحب اللون الطربي والرومانتيك واختيارتها الحياتيه واثقه وهادئه .. ماتفصح عن مكنونات قلبها بسهوله حتى

اقرب الناس لها .. وكلامها قليل جدا بحيث الكلمه المستفاد منها فقط ..

متعلقه باخوها فهد بشكل كبير لانه تقريبا هو اللي مربيها على يده لانه حين توفى ابوها كان عمرها تسع سنوات وهو عمره تقريبا 18 سنه ..

دق جوال هدى : هلا فيصل ..

فيصل : هلابك هدهد .. بالله اطلعوا وخل البنات يطلعن العيال ينتظرونهم برى

ورانا صلاة جمعه والوقت متاخر ..

هدى : انا اقول الفيصل مخلينا للساعه ثلاث شكل الدعوه فيها ورقه ..

فيصل : ههههههه اي والله قلنا دورتين وصارن عشرين ..

هدى : ههههههه طيب يالله طالعين الحين ..

ودعوا البنات بنات خالتهم وراحو لبيوتهم .. بعد ليله حلوه قضوها مع بعض

كما هي عادتهم كل ويك اند يكون اجتماعهم عند واحد من العايله ..

وهذا الشئ اللي خلاهم عايله متماسكه ومترابطه جدا بعيده كل البعد عن الحقد

والبغضاء والذي للاسف انتشر انتشارا كبيرا في هذه الاونه من الزمان ..

يتبع..

لـ نسخ الموضوع والاستفادة منه استخدمي هذا الرابط :
رواية .. الله يهنيني ..للكاتب : Guevara
http://www.brooonzyah.net/vb/t94135.html

ايف ارابيا ،،، موقع ازياء ومكياج للنخبة ،،، الصور في الموقع جريئة جدا

~~!؛"؛!اقــــدار الزمــــان!؛"؛!~~ · 06-01-2010, 08:06 PM

PART 2

لاهوا قبلك .. ولاامل بعدك ..
لاسما الا عيونك ..
ولاثرى الا في وعدك ..
انتي كل الناس وحدك .. انتي كل الناس وحدك ..
لاهوا قبلك .. ولاامل بعدك ..

كان المسجل يصدح بصوت ابو نوره الرخيم الساعه ست ونص الصباح ..
وكان الجو عليل ونسمات الصباح الحلوه .. كل شئ حلو الا هو كان تعبان
جدا .. تذكرها ابتسم .. حسها مثل البلسم دايم لتعبه وشقاه.. هانت هانت
ان شاء الله ..استوعب انه كان واقف عند البيت .. اطفا سيجارته ونزل ..

لما دخل البيت شاف امه جالسه بالحوش تقهوى .. راح يمها ونزل وحب راسها ..
ام فهد : حبيت الكعبه يمه .. اجلس تقهوى ..
فهد : كيف حالك الغاليه اليوم ؟
ام فهد : الحمد لله بعافيه ونعمه ..
فهد : الله يجعله دوم يمه ..
ام فهد وتمد له الفنجال : شلون دوامك امس ؟
فهد : والله تعب و بزياده بعد .. خصوصا المباره امس بعض الشباب الله يهاديهم بدلماهي اجواء فرح ووناسه وفريقه فايز مصًر يقلبها ماتم واحزان ..
ام فهد : ليه ياوليدي ؟
فهد : يزعجون العالم اخر الليل يرفعون المسجلات ومسيرات ويفحطون .. المشكله
لو بعيد عن الديره قلنا ماعليه .. لكن داخل الاحياء ويقلقون راحة الناس .. عاد امس فيه واحد يفحط له بحاره وصدم ولد صغير ..
ام فهد : لاحول ولاقوة الابالله ..
فهد: اي والله يايمه والولد حالته خطيره الى الان .. ومامدانا نخلص منه ونسوي
له محضر.. الا وبلاغ ثاني عن واحد قاطع اشاره بكل استهتار ومزهق روحه ونص
اللي معه ونص العائله اللي هو صادم ..
ام فهد : لاحول ولاقوة الابالله كان الله بعونهم ..
فهد : المشكله يعبرون عن فرحتهم غلط ومعرضين ارواحهم وارواح غيرهم لالف خطر وخطر ..
ام فهد : طيب يايمه انت تدوام بالمركز انت وسعودولد عمك ليش ينزلونك دوريه ؟
فهد : معك حق يالغاليه بس لازم يوم بالاسبوع ننزل مناوبه دوريه ؟
ام فهد : الله يخليك لي يايمه ويحفظك من عيال الحرام ..
فهد : امين ولايحرمني منك ياتاج راسي .. يمه ناقصكم شئ ؟
ام فهد : ما ينقص عمرك يايمه .. سلامتك ماناقصنا شئ ابد ..
فهد : عن اذنك يمه شوي واطيح من طولي بروح اريح شوي وقوميني
للصلاه ..
ام فهد : خير ان شاء الله ..

في بيت ابو فيصل :

ابو فيصل : والله هالولد مايندرى وش تحت راسه ..
ام فيصل : اّاّاّه بس يابو فيصل منا عيني اشوف عياله حولي بس شسوي ..
ابو فيصل : يمكن عذره قبل ماترَسم < اي لم يثبت وضعه الوظيفي " قاموس Guevara للهجه المحليه السعوديه .. صـ 992 ..
لكن الحين له سنه ومترسم وعلى مرتبه يالله لك الحمد ..ووضعه طيب
ان شاء الله .. وسعود بعد ماهو ببعيد عن وضع اخوه ..بس بيعين الله ان شاء الله ..
ام فيصل : بس يابو فيصل ..
ابو فيصل : عارف عارف وش بتقولين يمكن الماده صعبه والبيت اجار بس ..
انا افكر لي بطريقه اقلبها براسي من مده ..
ام فيصل :لاتاكل هم بتيَسر ان شاء الله يابوفيصل ..
على نزلة هند من الدرج تمغط < اي تحرك ايديها عاليا وبقوه للاحساس بالنشاط
" قاموس Guevara للهجه المحليه السعوديه .. صـ 690 .. "
صباح الخييييييييييييير ..
ابو فيصل + ام فيصل : صباح النور ..
ابو فيصل : هلا بنيتي الغاليه تعالي افطري ..
يعني بس هي الغاليه ..
ابو فيصل : لاو الله انتي واختك عينين في راس ..
هدى : ادري الله يخليك لنا ويطول بعمرك .. ونزلت عليه وحبت راسه وراس امها .
ابو فيصل : يالله باطلع المسجد ..
هند : بدري يبه خلنا نجلس معك شوي ..
ابو فيصل : مابقى الا ربع ساعه ويذن .. ام فيصل قومي العيال ماعاد الا خير .. <اي /تاخرنا كثيرا" قاموس Guevara للهجه المحليه السعوديه .. صـ 690 .."
ام فيصل والبنات : سلامتك ..
ابوفيصل اخذ بشته وطلع ..
هند : الله يعين على الدكتوره الغثيثه بكره <اي اللتي لاتحتمل ابدا " قاموس Guevara للهجه المحليه السعوديه .. صـ 690 .. "
هدى : ليه ؟
هند : عندي كويز بكره .. والكويزات اللي قبل كانت يافوق ياتحت ..
والمشكله قايله انه كامل للمنهج اللي درسناه يعني يمكن عليه التقييم
قبل الاختبار النهائي ..
هدى : طيب سهله الامور بعد الصلاه روحي ذاكري ..
هند : ان شاء الله هذا اللي بيصير .. وبعدين وش اضفتي لي بالله ..
هدى : هههههههههههه هذا جزى االلي يعطيك رايه ..
هند : اقول مالت عليك .. اروح اصلي واشوف اموري ابرك لي

في بيت ابو خالد :
بعد صلاة الجمعه على الغداء :

ام خالد : سامي خل نوف تكتب لك مقاضي < اي التبضع او التسوق .. " قاموس Guevara للهجه المحليه السعوديه .. صـ 237 .. "
بيسيرون علي جاراتي بعد العصر ..
سامي : يا ذا المقاضي اللي دبلتوا كبدي فيها كل يوم رح وتعال ..
ابوخالد بنظاراته السميكه والوجه اللي جعدته السنين : افا ياسامي اذا ماعتمدوا
عليك من اجل ..
سامي : العفو يبه بس يعتمدون على خالد شوي مو كل شئ على راسي
خالد : انا اخوك الكبير وعندي مشاغلي ..
سامي : هاذي ضريبة الاخو الصغير دايم كل شئ براسه .. لا ولادوام ولاشئ
يعني كملت ..
الكل : ههههههههههههههههههههههههههههههههه
مها : ماحصلت ياسامي شئ للان ..
سامي : لاوالله يام احمد الى الان .. وبعدين مامن عجله ماتخرجت الا السنه اللي فاتت .. يعني مطولين شوي ...
مها : بس ولو لازم تدور ماهو حل انك جالس كذا لاشغل ولامشغله ..
سامي : المشكله يام احمد وظائف حكوميه مافيه الا عن طريق الديوان .. والديوان
مافتح للثانوي من خمس سنوات .. والعسكريه صعبه الحين شروطهم صعبه وصعوبه في القبول ومو مثل قبل .. هذا غير اللالاف اللي يقدمون والمطلوب باالدوره خمس مية مجند .. وان رحتي للشركات امان وظيفي مافيه هذا غيرالكرف
والراتب مو قد الوظيفه .. وازيدك من الشعر بيت اكثر من 70 % مومسجلين
بالتامينات الاجتماعيه .. خليها على الله .. بس والله هالوقت ماينفع الا فيتامين واو.
ابو خالد : وتقطع رزق غيرك افا ياسامي بس .. كذا ربيتك ..
سامي : العفو يبه قلنا نمزح شوي ..
مها : والله معاناه .. لو يلقون حلول لها البطاله اللي صايره شبح للشباب ..اللي
الجامعيين مو لاقين وظايف .. كيف الثانوي اجل ؟؟؟
خالد : المشكله كبيره وكبيره مره الواسطه دخلت بكل شئ وقضت على الموهلات
والشهادات .. والشركات اللي هي البديل واللي عليها اقبال .. يرفعون ضغط الواحد دبلوم + خبره 3 سنين + اجادة خمس لغات +مادري شنو ..
الكل : هههههههههههههههههههههههههههههههههههه
خالد : والله فعلا شئ يقهر .. لكن نتوكل على الله وبتيسر امورك وانا اخوك ..
ام خالد : ان شاء الله ياوليدي الله يسمع منك ..
مر الاسبوع روتيني كما هو المعتاد ..
بعدها تقريبا باسبوع في بيت ابومشاري ( الاجتماع العائلي المعتاد ) :
بدخلة ابوسلطان على الشيبان والشباب < حلوووه: مساكم الله بالخير ..
ابومشاري+ابوخالد : مساك الله بمثله ..
بعد ماسلمو الشيبان عليه والعيال على عمهم .. وجلسوا ..
*خلونا نتكلم عن ابو فيصل شوي .. ( كان في بداية عمره واول ماتوظف كان
متورط ماستطاع يكون نفسه .. كان ابوه مديون دين ثقيل ولما اتوفى ماسمحوله
الديًانه .. واخوه خالد تاخر وماتوظف.. ولما توظف ومع مساعدة اخوه يالله قاموا به وسددوه .. ولما قام على حيله دخل باشغال حره وخسر خساره كبيره .. وكانت
لمشاكل زوجته مع زوجة اخوه وانسبائه .. اثر كبير في حياته ومعانته ايضا .. اللتي كانت لحالها بفتعال المشاكل .. وحتى اهلها لم يكونوا مثلها .. فكانت حياته مأساه .. ولما تقاعد وشاف انه ماكون نفسه ولاشئ .. اخذ حقوقه وسدد ماتبقى عليه من ديون .. وفتح محلين خضار وفواكه وتوفق فيهن كثير وزانت اموره .. فكان مثال للحكمه والصبر وله احترامه .. وتقديره مع ان ابو مشاري اكبر سنا منه الا انه له هيبته ووقاره بالعائله .. )
ابو فيصل : وشلونكم طيبين عسى الامور زينه ..
ابومشاري : بخير يمال الخير ..
ابو خالد : ابشرك الامور زينه وطيبه ..
ابو فيصل : عساه دوم ان شاء الله ..
ابوفيصل : يا خالد وش سويت بالرجال اللي ارسلته عليك اليوم ؟
خالد : اصلا ملفه كامل واموره نظاميه .. بس مشيته بسرعه ماخليته ينتظر ..
ابو فيصل : بيض الله وجهك ياولدي ..
خالد : وجهك ابيض ياخالي ..
مشاري : حركات واسطات ياخلوووووود الجو علينا ..
خالد : مووووووووووت واشبع قهرررررررررررر ..
مشاري وياشر بيديه : حمد الله والشكر على نعمة العقل بس ..
فيصل : وش فيكم بزران .. عاد نسايب وكل واحد الله يخلف عليه..
مع هالكلام كانوا الشيبان يتناقشون بموضوع سامي ..
جاء بيرد مشاري الا ويقاطعهم ابو فيصل بصوته الجهوري .. ياسامي ..
سامي وينزل جواله على جنب : سم خالي ..
ابوفيصل : ماودك تكمل دراستك ..
سامي : لا والله ياعمي مافيني حيل دراسه .. وبعدين انا ابي لي وظيفه ..
ابو خالد : حاولنا له بالزراعه هنا .. بس من صار التعيين عن طريق الديوان
صار مافيه امل .. وهو مايبي على البند ..
ابوفيصل : طيب ماتبي الحرس ياوليدي ..
سامي : ياخالي الحرس بالرياض وصعبه تدري فيني اموت ان طلعت من بريده ..
سلمان : ليه سمك تطلع من الماء تموت ..
مشاري : هه هه هه هه هه هه هه ياربي باموت من الضحك ..
تركي : والله واستلموه الشيبان ..
سلمان :اي والله راح فيها المسكين ..
ابو مشاري : بس وانا عمك الجلسه كذا ماهي زينه
سامي : جاء بيرد الا جواله يدق عليه واحد من خوياه ..
هلا .......... عليكم السلام .............. والله على ماتحب ...... سم .........لاه زين والله متى ............ جزاك الله خير .............. طيب يالغالي مع السلامه ..
خالد : خير ان شاء الله سامي ..
سامي : لاخير بس فيه تسجيل بالامن العام السبت وهذا خويي داق علي يعلمني ..
فهد : خلك مواصل على الموقع تعرف العالم كثير اللي بيسجلون .. واذا خذت رقم
عطني خبر .. عشان اشوف الوضع ..
سامي : ان شاء الله يابو خالد
ابو فيصل : عسى ماشر يافهد مالك صوت يالغالي ..
فهد : سلامتك ياعمي بس والله مصدع شوي .. والدوام متعبنا اليوم ..
الكل : ماتشوف شر ..
فهد : مايجيكم ان شاء الله ..
عند البنات ..
الهنوف : بنات اختي الحلوات الرقيقات شذى وندى ..
شذى + ندى : نعم ..
الهنوف : امنية حياتي تردوا علي كل وحده بلحالها ..
شذى + ندى : بنحاول .. ويطالعون بعض ويضحكون ..
رغد وهند طالعين من المطبخ ورايحين للمقلط ..
هند : ليه ماتساعدوننا بالعشا ..
شذى : والله المناكير مانشف ..
ندى : مانشف المناكير والله .. عشانك خالتو ..
الهنوف : يسلمو يابت .. اما انا حاطه كريــــم على اديه ..
رغد : خليك منهم هالسخيفين .. انا اعرف شلون اتفاهم معهم بعد شوي ..
الهنوف : طالع بس رغيد تهدد ومن تهددني انا الهنوف ..
رغد : زين نشووووووووف ..
على دخلة باقي البنات جايين من عند العجز .. تطوعت هدى وهديل يساعدون البنات بتقليط العشاء .. الهنوف : وينكم من اليوم ..
نوف : عند العجز نقهويهن وهات ياحش وهات يافلانه سوت وهات يافلانه قالت ..
البنات : ههههههههههههههههههه ... وفجاااااااااااااااااااااااااه ..
اااااااااااااااااااااااااااااااااااااااااااااااه لحقوا علي .

~~!؛"؛!اقــــدار الزمــــان!؛"؛!~~ · 06-01-2010, 08:08 PM

PART 3

مها : ااااااااااااااااااااااااااااااااااااااااه يمممممممممممممممممه ..
العجز والبنات .. راحو يركضون ناحية الصوت واللي كان جاي من صوب الدرج ..
ام خالد : يمه وش فيك ..
مها : شكلي بولد يممممه .. لحقي علي ..
ام خالد : نووووف دقي على خالد بسرررررعه .. الهنوف جيبي عبايتها بسرعه ..
خالد اللي كان يكلم بحوش النساء وسمع الاصوات وجاء يتطمن عليهم ..
الاجواله يدق : هلا نوف خير وش فيكم ..
نوف : مها تولد بسرعه ياخالد بسرعه ..
خالد اللي انسطل < اي لم يستوعب الموقف " قاموس Guevara للهجه المحليه السعوديه .. صـ 623 .." : هاااه طيب ... طيب شسوي .. <ساعات تجي الشخص
حالات غباء مؤقته ومن اعراضها .. ماتدري من انت او وين واقف او شهدفك بالحياه ..< صيغة مبالغه خخخخخخخخخ ..
نوف : شتسوي قرب السياره ياحظي ..
خالد : طيب طيب ..
جابت الهنوف عباية مها وبمساعدة ام خالد والبنات ركبوها السياره والى المستشفى,نجي للبنات اللي كانو على اعصابهم والعجز يدعون ان الله يسهل عليها
هديل : الله يقومها بالسلامه يارب ..
البنات : امين ..
هدى و نوف: اللي كانن جالسات يبكن .. قامت عندها الهنوف تهديهن .. ورغد اللي كانت تهز رجلها بتوتر .. والبقيه ملامحهم وتعابير وجهيهم غير مفهومه ابدا كانت مشاعر مختلطه

بالسياره :
كان خالد مسرع بيوصل بسرعه للمستشفى .. كان يوم خميس والشوارع زحمه..
ام خالد : من المغرب والام بطنك ماريحتني ابدا .. قلتلك مو من اكل امس ..
خالد بينه وبين نفسه : ياسلام سلم من المغرب والحين تسعه ونص والله اللي رحنا فيها .. معقوله تسويها ام احمد وتولد الحين .. استبعد الفكره نهائيا .. طيب اتلحلح واسرع ... وهو شغال بالنور العالي والبواري للي قدامه .. شوي الا هم واصلين ..
نزلوا .. ومع مساعدة الممرضات دخلوا ام احمد قسم الولاده ..

في بيت ابو مشاري :
وشلون ........ طيب يالله جايكم .. مشاري اللي كان بيدخل يتعشى كلمه خالد وقاله
دخل واستاذن من ابوه وعمامه وطلع بسرعه ..
فيصل اللي كان شاك باختفاء خالد ومشاري المفاجئ بس ماعطى الموضوع اهميه
بعد ساعتين انتظار : دق مشاري على ابوه : يبببببببببببه ابشرك ..
ابو مشاري : خير ان شاء الله فقعت اذني ..
مشاري : ابشرك ببنوته .. جتني بنت بنت يبه ..
ابو مشاري : الله يبشرك بالخير ياولدي ويجعلها تربى بعزك ان شاء الله ..
ومها شلونها بشرني عنها ..
مشاري : لابشرك صحتها زينه وطيبه ..
ابو مشاري : الله يجعله ان شاء الله ويقومها بالسلامه ..
ابو سلطان اللي كان بيمشي بس يوم سمع الموضوع جلس وبارك لابو مشاري
وابو خالد ..
العيال اتصلوا على ولد عمهم وباركوا له .. وحتى سعود اللي كان عنده مناوبه
دق عليه مشاري و بشره بارك له سعود ..

عند البنات :
كان الانتظار على اشده وسكوووت رهيب يعم المكان .....
سالني بياع الورد بعده بيحبك بعد
شو بدي قوووووووول
جاوبته لبياع الورد بعدو البي عالوعد
وهو مشغووووووووول .. كان جوال هدى والنغمه الخاصه لخالد ..
كانت زعلانه منه اسبوع فات ماتصل عليها .. بس الوضع اللي هم فيه ماهو وضع
عتاب .. ملك قلبي يتصل بك .. ردت بسرعه ... : هلا خالد ..
خالد : ابشررررررررك مهااوي ولدت وجابت بنوووووته ..
هدى اللي كانت فرحتها موسايعتها : الله يبشرك بالخير ياقلبي .. يالله بابشرهم ..
خالد : يالله اكلمك الليله .. هدى : ان شاء الله ...
هدى بشرت البنات وفرحوا لـ مها كثيييير وراحت تبشر العجز اقصد البنات .. خخخ
حلا : هدى ببشرهم معك تكفين ..
هدى : يالله احلاهم مشينا ..
والعجايز دقوا على ام خالد وباركولها بحفيدتها الاولى ..
بعد ماجلسوا وهم مبسوطين لمها ورجعت البسمه لهم ..
نوف : هين اوريه اخوووي ليه مااتصل علي يبشرني ..
ام مشاري : هو ماتصل على احد غريب .. اتصل على زوجته ..
هدى وجهها قب ضو .. نوف : اي والله حنا الحين راحت علينا ياخاله ..
طلعت هدى من المجلس وتركته لحم وهي مولعه من الحيا ..
اتصلوا الرجال على الحريم وبلغوهم انهم بيمشون ..
طلعت نوف لهدى .. بتبلغها جت لها : يئبرني الخجلان انا ..
هدى : يالله روحي لارتكب فيك جريمه الحين ..
نوف : يابنت الحين انتي عكس الاناث اللي تستحي تصير رقيقه ..وانتي عدوانيه وقشرا بعد اعوذ بالله .. الله يعين اخوي عليك ..

هدى : يطول بس .. نوف : شف الغرور بس يالله مناك يالشينه ..
هدى وتحذفها بـ " كلينكس " : طيب شتبين مني الحين ..
نوف وتمسكه : اهلك مشوا ياحلوووه الا اذا كنتي ناويه تبين تباتين هنا .. "وتحرك حواجبها بحركه استفزازيه " ..
هدى اللي ولعت : هين اوريك يالتسلبه .. ونوف راحت تركض منها ..
وهم يقومون بالمطارده حامية الوطيس في ارجاء البيت < حلوووه الوطيس
ام فيصل : هاااو خير ان شاء الله ..
ام مشاري : اللي كبركن عيالهن اكبر منهن وانتن كذا ..
هدى تتحرطم .. انا اللي جبته لنفسي .. وتاشر لنوف وتمسك دقنها وتقول اوريك ..
" ياخي البنات عليهم حركات ترفع الضغط .. طيب وين الدقن اللي تمسكين ..
هههههههههههههههههههههههههه والله العظيم حاله .. "
نوف اللي كانت تضحك على بنت خالتها ودعتهم بكل حب .. العجز راحن يمشن وطاحن حش في بنات هالوقت .. ويستعيدن الزمان الجميل ايامهم ايام التربيه السنعه < والله مافي فرق بس سوالف عجز مثلكم خابرين .. تفرقوا متفقين يزورون مها بكره ..

عالساعه وحده بالليل ..
ملك قلبي يتصل بك ترددت ترد او لا .. خذت نفس عميق ردت .. الو ..
خالد : لما شافها ردت قرب الجوال للمسجل ..
ابي تعذرين احساسي اذا قصرت .. وابي تعذرين لو قصرت في حقك
او قصر كلامي كلامي وماوصفت شعور ..
يابنت النور يابنت النور ياعقد من الوله منثوووووور ..
انحرجت منه حيل لانه اعتذر منها بهالمقطع .. باسلوب حلو ومرتب ..
بس هي كانت تبي منه تفسير .. مو مقطع من اغنيه ..
هدى : خالد اهون عليك اسبوع .. اسبوع ياخالد ..
خالد : لا يالغاليه ماتهونين علي ابد بس والله انشغلت الاسبوع اللي
فات كثير .. من دوام وقرف الدوام الى الشباب نقلوا الى استراحتهم
الجديده .. وشوية اشغال كذا ..
هدى : ياخالد انا ماطلب منك كثير عشر دقائق ربع ساعه باليوم كافي لي وكثير علي بعد .. ياخالد انا اموت واعرف اخبارك يوميا وانت ولاعلى بالك من اي شئ < انتبهت وش هببت < اي قالت كلام ماهو بوقته " قاموس Guevara للهجه المحليه السعوديه .. صـ 908 .."
خالد : الله للدرجه ذي غالي عليك انا ..
هدى بينها وبين نفسها " مصيبه ياخالد اذا للان ماتعرف غلاك بقلبي " ..........
خالد : خلاص والله اسف ياهدى ماهون عليك صح ..
هدى بينها وبين نفسها "تدري انك ماتهون علي لوهانت الدنيا كلها انت لا " :
خلاص قلبي لاتاسف ماصار الا كل خير ..
خالد : طيب يالغاليه تامريني شئ ..
هدى " كالعاده " : لاسلامتك ورضاك ..
خالد : مع السلامه ..
ماقلت لي (وينك)؟ ولاشفتك اشتقت ..
احساس حطم كل الاحساس فيني ..
ماتدري كم اخذت من وقت تطالع شاشة الجوال بس الاكيد كان وقت طويل جدا..
كانت دموعها مغرقه الشاشه .. كانت مثل اي فتاه بسنها من طفوله الى مراهقه الى بنت ناضجه .. ولكنها توقفت عند المراهقه كثيرا كانت تعلقت بولد خالها خالد
حبته الى اخر ذرها الى بكيانها كبرت .. سنه ورا سنه .. كبر حبه معها .. كانت فرحة ماتوصف اذا كان عند اخوانها في البيت .. كل شئ يروح مرتب كل شئ غير حتى تكون شعله من النشاط في البيت .. لما تقدم لها كانت فرحة حياتها الكبرى ..
كانت تظن يحبها يموت عليها .. مادرت انه خطبها مثلها مثل اي بنت ثانيه .. يعني
ماكان محدد .. خطبه عائليه واهله اختاروها له .. وهي طبعا كانت تظن العكس تماما .. كانت مندفعه وهو بارد كانت حاسه انها لقت الجنه .. بس حصلت لسى باقي درب طويل طويل طويل ..... سلمت نفسها لسريرها وراحت بنوم عميق ..

وعند خالد .. اللي كان مايدري ايش يسوي انا مثل اي ولد صغير وبعده مراهق وبعده رجل وموظف .. ضبطت اموري .. دورت بنت الحلال استقريت معها وكونا حياه حلوه " من منا اللي ما يتمنى كذا " شسوي احاول ابدا معها حبه حبه .. وحتى لو كلمتها واخذت معها ساعات شنو مواضيعنا اللي نتكلم فيها مادري .. انا ببدى من اول الدرج حتى اصل النهايه .. طيب ليه ماتتقبلني يمكن مغصوبه علي < يابن الحلال وش هالتفكير الشين .. لا لا مستحيل ماتوقع مغصوبه .. طيب ليش الحس البارد تجاهي والله مادري حس انه مصدع حيل .. وسلم نفسه وناااااااااااااام

مشكلة هالثنين كل واحد اخذ تفكير كله غلط عن الثاني .. الله يهدي سرهم ..
هل بتزين امورهم .. بنشوف مع احداث القصه ..

بكره العصر بالمستشفى :
كانو الكل مجتمعين عند مها بالمستشفى وجو حلو من اروع مايكون ..
ويلاعبون الصغيره اللي كانت بسرير صغير بجنب امها ..
ام مشاري : وش ناويه تسمينها يا ام احمد ؟
مها : والله ياعمه متفقه انا ومشاري من زمان نسميها جولي ..
ام خالد : يايمه ورى ماتسمين رهف والا رشا ..
ام مشاري : والا اسماء ..
مها : لا بس هاذي اسامي قديمه شوي ودي باسم حديث ..
البنات : ووااااووووو روعه جولي ..
شذى : صراحه اختيار موفق ..
ندى : بقووه حلو صراحه ..
رغد : يخليها لك ان شاء الله ..
مها : الله يسلمك حبيبتي ..

برى القسم كان مشاري وفهد وسعود وخالد ........
مشاري اللي كانت موسايعته الفرحه وباين من عيونه ..
فهد : عساه دوم مويوم الفرحه يابواحمد ..
سعود : اللهم امين ويديمها علينا وعليك ..
مشاري : امين .. الله يسلمكم .. وعقبالكم ..
طلع عليهم خالد من دورة المياه : ماحلى الراحه في بيت الراحه ..
العيال : هههههههههههههههههههههههه ..
خالد : وش سميت بنت اختي ابو احمد ..
مشاري : يعني وانا اطلع برى ماهي بنتي ..
خالد : يابن الحلال من قال كذا .. طيب وش سميت بنتك ..
مشاري : يعني ماهي بنت اختك .. طلعت اختك برى ..
خالد اللي انفقعت مرارته من نسيبه < اي انفجرت .. " قاموس Guevara للهجه المحليه السعوديه .. صـ 504 .." : ياخبر بفلوس بكره ببلاش ..
مشاري : امزح معك .. سميتها جولي ..
فهد : والله اختيار موووفق صراحه ..
سعود : اي والله ونعم الاختيار اسم عصري وحلو ..
خالد : اصلا الاسامي الحلوه ذوق اختي .. جاء بيرد مشاري ..
الا و دخلوا الشيبان عليهم ..
ابو مشاري : مبروك يابوووك تربى بعزك ان شاء الله ..
ابو خالد : الله يبلغك فيها يابوك ..
مشاري : الله يبارك فيكم ويسلمكم ..
ابو فيصل : مبروك يابو احمد وشلون البنيه ان شاء الله طيبه ..
مشاري : لابشرك طيبه ياربي لك الحمد ..
ابو مشاري : وش سميتها يابوك .. مشاري : سميتها جولي يبه ..
ابو مشاري : مالقيت لك اسم احسن .. والشيبان وضح عليهم عدم الرضا ..
خالد : حاولت فيه ماطاع .. هذا اللي اخذناه من الكفار واساميهم < بيرد له الحركه
مشاري يضحك : بس الاسم عند امها .. خالد باذن مشاري : ايه حطها على اختي
ابو مشاري : دامها عند بنيتي ام احمد خلاص اللي تبيه تسويه ..مشاري : وانا يبه راحت علي خلاص ..
الشيبان : ههههههههههههههههه < يعرفون كثر غلا ابو مشاري لمها ..
ابو مشاري للشيبان : مشينا استراحة الرجال .. يامشاري جب القهوه ..
مشاري : ان شاء الله يبه ..
مشوا الشيبان وهم يتكلمون عن عيال هالجيل واسامي هالجيل وان كل شئ اختلف < تعرفون سوالف شيبان ..

~~!؛"؛!اقــــدار الزمــــان!؛"؛!~~ · 06-01-2010, 08:11 PM

PART 4

بعد ثلاث شهور من الاحداث السابقه .. قبل الاختبارات النهائيه :
لاحرااااام والله قهر .. قهر .. كوريا نطلع من من كوريا ..
كانوا الشباب مذهولين .. ماحد مصدق اللي صار .. السعوديه وبطلت اسيا ثلاث مرات تطلع وقدام فريق مغمور بالنسبه لنا .......... < للحين فييييييني قهررر .....
سعود : انتم تشوفون اللي اشوفه ..
تركي : اي والله نشوف اااااااااه يالقهر بس..
مشاري : لاقهر ولا شئ خلاص فيه امل بالملحق .. وبنتاهل ..
سامي : الملحق والا المجلس هههههههههههههههههههه
تركي وسلمان اللي كانوا تزين فوق روسهم شاهي < صيغة مبالغه ..
من كثر ماهم معصبين .. اللي ارسل عليه الريموت والثاني بالجوال < مايعرفون يمزحون ((×_×)) ..
سامي : روقو ياشباب والله مايستاهل وبعدين فيه فرصه مثل ماتفضل الاخ ..
فيصل : بس لاهجوم لاوسط لادفاع .. اليوم صراحه اشباه لاعبين ..
ودخلوا الاستديو التحليلي الخاص فيهم ..
نرووووح هناااااااااك لشخص كان معهم جسديا غائب كليا ..

لو كان عمري بيديني فدوتك عمري
لكن عمري بيدين اللي ترجيته
انه يرد الزمان اللــي علــى خبـري
واعيش ليلك وحلـم كم تـمنيته ..
راااااااااااااااح هناك قبل كم سنه والى صوره نادرا تغيب عن باله .. هناك قبل خمسة عشر عام هنااااااااك في بيت خاله سعد ........
كانت هديل راجعه من المدرسه ومعاها نتيجتها النهائيه .. كانت راسبه واخذت
من اهلها توبيخ شديد جدا .. طلعت تبكي بالحوش .. طلعوا من البيت فيصل وفهد
وكان فرحانين بنجاهم وماخذين هداياهم ويركضون بكل براءه فيها تعبير كبير بفرحتهم < تخيلوهم معي .. وقف فهد وشافها تبكي وتحاول تجاهد دموعها ..
وقف وعرف اللي فيها اخذ هديته ومدها لها اللي كانت عباره عن خمسين ريال
هديل : لا لا مابي .. وفهد بدون اي كلمه كعادته لما يصر على شئ .. يعطيك نظره
فيها اصرار من دون ولاكلمه .. تجبر المقابل على القبول والتسليم لامره ..
هديل : ليه انت شنو ذنبك .
فهد واللي معاها تتغير كل المبادئ يكون انسان ثاني يصير بدنيا غير دنيا :
وانتي ماكان ذنبك ترسبين ..
هديل : صح .. بس انت ناجح وهذي هديتك ..
فهد : وانا وانتي واحد ..
هديل : شكـ ـ ــ ـرا .. فـ ـ ـهد ..
اخذت هديل الهديه وقامت تمسح دموعها بكم بلوزتها وراحت تركض داخل البيت .
وطبعا لما تجمعوا البنات كانت نوف راسبه مثلها ولامعاها هديه زي البنات ماعدا ..... اكيد عرفتوها كانت فرحانه فرحة الناجحات ويمكن اكثر ..
تذكرها وذكر ذيك الايام .. اااااااااااه ياهديل اااااااااااه لو تدرين عن غلاك اللي كبر معي .. عن حبك اللي كنت ومازلت استند عليه بكثير من مراحل حياااااتي ...........

صحا من الحلم على فيصل وهو ياشر قدام عيونه .. ..
فيصل : وين النااااااااااااااااااااس .. شكلك طالع مشوار بعيد ..
فهد : هههههه لا قريب الدائري الشرقي ..
العيال : ههههههههههههههههههههههههههههههههههه ..
استاذنوا العيال من فيصل وطلعوا االى بيوتهم ..

من بكره :
خالد : مساك الله بالخير ياعمي ..
ابو فيصل : مساك الله بالنور والسرور ..
خالد : ياعم انا جايب مهر هدى اليوم وامانه معك .. ينقص شئ تبلغوني
ابو فيصل : عسى الله يكثر خيرك وانا عمك ..
خالد : يالله انا استاذن ياعمي ..
ابو فيصل : اذنك معك بالتوفيق ياخالد ..
طلع خالد من عمه ودق على هدى ..
هدى : هلا ..
خالد بصوته الرخيم : اهلين هدى اخبارك ..
هدى : الحمد لله ..
خالد : هدى ترى عطيت الوالد المهر .. اذا نقص عليك شئ عطيني خبر ..
هدى : .................................................. ...........
خالد : وينو لسانك اكلو القط ..
هدى " من وسط احراجها " : ( خالد يمزح معي من يصدق .. هاذي لحظات مستحيل افوتها .. يالله قولي له كلمتين .. )
خالد : هدى .. الووووو .. الووو
هدى : هلا معاك ..
خالد " حس باحراجها " : طيب .. تامريني شئ ..
هدى : سلامتك ..
سكرت منه وهي تقول الى متى هالبرود .. لما ينصدم الواحد ببدايته .. وينهدم كل شئ بناه .. صعب يبدى من جديد .. وهويقول وش هاللقافه اصلا ابوها بيبلغها .. اللي استفدت منه احرجت البنت وبس ..
< الله يعيني عليهم ............... (×_×)
في الدوام عند خالد :
خالد : ياخي انت ماتفهم اقولك النظام مايسمح ..
المراجع : ايه النظام مايسمح وتطلعون بلاوي من ورانا ..
خالد : لو سمحت اطلع برى ..
المراجع : يابن الحلال ندهن سيرك وتلين مثل غيرك < اي رشوه " قاموس Guevara للهجه المحليه السعوديه .. صـ 562 .."
حمد زميل خالد بالدوام اخذ الرجال وطلعه بكل قوه برى المكتب .. ونادى الامن وتفاهموا معه زين .. (*_^)
خالد اللي كانت مقفله معاه : شفت هالوقح لا ويقولها لي كاش ..
حمد : يعني لوغلفها لك من ورانا ممكن توافق ..
خالد : حمد فكني من شرك ..
حمد : لا قل قل بعد ..
خالد : لاياتعبان .. وقام خالد عليه ومعاه كوب الشاهي بيمزح عليه فيه ..
الا وبدخلة المدير عليهم .. خالد اللي صرف الموضوع كان الكوب فيه وسخ وقاعد يدقق فيها عند النافذه < تخيلوه .. ههههه.. المدير : خير وش اللي صار قبل شوي حمد : سلامتك طال عمرك واحد مايفهم تفاهمنا معه ..
المدير: اهم شئ الكلمه الطيبه للمراجعين .. عن اذنكم ..
الشباب : اذنك معك طال عمرك .. .. بعد ماطلع المدير .. ..
خالد : بالله لو سمع الكلام اللي قبل شوي كان هذا كلامه ..
حمد : يابن الحلال خلها على الله .. الناس انعمت ماهمها الا فلوس وبس ..
خالد : اي والله .. المشكله يجيبون هالعمال وينشرهم بالبلد وياخذ منه 15 الى 20 الف ريال على الفيزا والمشكله يقول يالله روح اشتغل وعطني 500 ريال شهريا ..
حمد : والعامل يشتغل مايشتغل باللي مايحفظه اهم شئ اخر الشهر ..
خالد : وتشوف الجرائم والمشاكل من ورى طمع وجشع الكفيل اللي ابد مافكر ولوتفكير بسيط بمصلحة البلد .. وانت تشوف المشكله كل يوم بزياده ..
حمد : الله يعين .. لكن ان شاء الله يلقون للمشكله حل ويريحونا ..
خالد : نقول ان شاء الله ..
ورجعوا لعملهم بعد دخول مراجع جديد .....................................

في بيت ابو مشاري ..
سلمان : وش رايك يبه ..
ابو مشاري : والله ياوليدي مادري .. لاتستعجل وتغامر ..
سلمان : مثل منت عارف يبه انا من اول السنه متخرج .. ومسوي دراسه من اول السنه للمواقع وانا واثق بعد الله من الربح ان شاء الله .. وبالنسبه لراس المال زي
ماقلتلك من صندوق عبد اللطيف جميل لدعم المشاريع الصغيره.. والتسديد بعد مده من بداية المشروع ..
ابو مشاري : اذا كذا بالتوفيق ان شاء الله ..
توضيح ( سلمان بيفتح كوفي شوب في موقعين وهي البدايه وباكورة المشاريع )
طلع سلمان من عند ابوه وقابل مشاري ورغد بالصاله ..
سلمان : مساء الخير ..
رغد ومشاري : مساء النور ..
سلمان : وانت ماعندك دوام كل ماجي البيت القاك مطيح هنا حلل راتبك ياولد ..
مشاري : خمسه وخميسه ..
سلمان ورغد : ههههههههههههههههههههههه
سلمان : الله يقطع بليسك يابواحمد .. ..
مشاري : لا اليوم افتكينا من البزران بدري ولاتنسى الاسبوع الجاي نعطل ..
رغد : الله يوفق الجميع ان شاء الله .. طيب السلمي ماذا اسفر عنه نتائج الاجتماع؟
سلمان :خلاص الراس الكبير واخذنا موافقته والباقي يهون ..
مشاري : الله يوفقك .. طيب ياسلمان والله اني خائف من الكوفي شوب لانه كثر هالنشاط مره ..
سلمان : لا يابو احمد المواقع اللي انا مختارها مافيها اي نشاط من هالنوع .. وغير كذا بفتحهن قدام ساحتين البلديه للعزاب ..
مشاري : قصدك المسطحات الخضراء ..
سلمان : ايوه عليك نور وقدام كل حديقه كوفي شوب وفيه جلسات خارجيه .. وجلسات داخليه وكبائن انترنت ومكان مجهز للمباريات وبروجكتر للعرض
واكيد وجبات ومشروبات .. والحلو فيه وقت المباريات الكبيره اقدر استغل
الساحات واعرض المباريات برى ..
مشاري : والله فكره ما شاء الله عليك .. بس موكانها بتكلف ..
سلمان : اولا المحلين من النوع الميت وايجارهم راح يكون رخيص شوي
وعلى بال مايخلص الشغل بالحدائق اكون خلصت وهم انتهوا .. وثانيا ياعزيزي كلووو على القرض ..
رغد : كلامك حلووو .. بس ليش ماتفتح مقهى وسوق نسواني يعني على شان نتسوق ببلاش ولا نروح لغيرك ..
سلمان : ههههههه على شان من اول اسبوع اعلن افلاسي منك ومن بنات عمك
رغد ومشاري : هههههههههههههههههه
رغد : حرام عليك حنا كذا
سلمان : هههههه سلامات سوق نسواني اكثر ماكثر الله اسواقكم يالحريم .. وكل شئ لكم كل شئ عوائل .. وحنا يالشباب وش لنا والله نتعب وندوخ ولانحصل مكان نروح له ..
رغد : بلا ماهو منكم من حركات النص كم اللي تسوونها .. يعني انتم والعوائل بمكان واحد ماتصلحون سوا ..
مشاري : اما انا الحمد لله افتكينا من صراع عوائل وعزاب ..
رغد وسلمان : هههههههههههههههههههههههههه ..
سلمان : صراع مره وحده هههههه .. بس يارغد والله اصابع يدك ماهي سوى ..
بس الحمد لله يعني حنا مو مثل قبل الحين فيه انديه صحيه فيه انديه ثقافيه وبعض الاسواق بدت تفهم وصار الصباح يدخلون العزاب عادي وفيه الانترنت
اللي من دونه مادري شلون بتكون حياتنا .. وبالتاكيد فيه المقاهي ......
قاطعته رغد : ايوووووه ركز على المقاهي ..
الكل : ههههههههههههههههههههههههه ..
دخلوا الهنوف وهديل .. وكالعاده مناقر ويا بعض ..
سلمان : حتى انتم ليه ماداومتم اليوم ..
الهنوف +هديل : ماخذين اجازه .. < مع بعض ..
رغد : انتقلت العدوى .. < تقصد شذى وندى
الهنوف : هـ هـ هـ ابواحمد شف هديل ماترضى تعطيني الكنكت ..
مشاري : طيب عندك dsl .. وش تبين فيها ..
الهنوف : ناسي ان اخوي سوى حفله بالبكسيه .. <اي صندوق خطوط الهاتف " قاموس Guevara للهجه المحليه السعوديه .. صـ 1117 .."
(توضيح : ابو مشاري لما جاء بيوقف امس عند البيت طيَر البكسيه )
مشاري ورغد وسلمان : ههههههههههههههههههههههههههه
هديل : اقول احترمي نفسك ولاتتكلمين على ابوي ..
الهنوف : كان اخوي قبل مايكون ابوك ..
هديل : هه هه هه كان ابوي قبل مايكون اخوك بسنه ..
الهنوف : يا هالسنه اللي ذليتينا فيها ..
هديل : يقولون اكبر منك بيوم اعلم منك بسنه .. عاد شوفي كم سنه اعلم منك انا البقيه : هههههههههههههههههههههههههه ..
الهنوف : هـ هـ هـ هـ انا خالتك وانا اكبر منك بسنه تساوينا ..
هديل : مافيك حيله ياخالتي ..
سلمان : فالك الكنكت يالهنوف ..
هديل : اقووووول يالله ماراح تاخذه ..
مشاري : طيب ضروري ياخالتي ..
الهنوف : والله انك احلاهم انت الوحيد بهالبيت تناديني خاله مع انك اكبر مني
بـسبع سنين منت مثل غيرك خصوصا ام سنه هاذي ..
هديل : ام سنه اجل .. طيب ماراح تاخذينه زين ..
مشاري : ماقلتي لي ياخاله ضروري ..
الهنوف : اكيد يابواحمد المديره بترسل درجات النصف الاول على ايميلي ..
وبجمع الدرجات النهائيه للطالبات .. يعني مو مهم بالله..
مشاري : خلاص هديل يالله اعطيه خالتك .. هديل : ابواحمممممد ..
مشاري : هدييييل < يقلدها .. اعطته الهنوف ..
هديل : على شانك والا هاذي ماتستاهل .. الهنوف : هين اوريك ..وراحو يركضون
مشاري وياشر بيده : الحمد لله والشكر بس .. اذا حريم وكذا ..
رغد : بس والله تطور الدرجات بالايميل ..
سلمان : مو اقولكم حياتنا قبل السرعه والانترنت مادري شلون صايره ..
مشاري : فعلا حل امور كثيييييييره بحياتنا ..
مشاري : يالله صلينا ياسلمان الظهر داخل له ربع ساعه ..
سلمان : هههههه وش اسوي رجونا البنات ..
مشاري : ههههههههه اي والله صادق .. وطلعوا للمسجدجميع ..

~~!؛"؛!اقــــدار الزمــــان!؛"؛!~~ · 06-01-2010, 08:16 PM

طبعاً ماانتيهنا ...الروايه تو فر ِش...لما ينزل الكاتب الباقي راح اعرضه>>يعني كنوع من التشويق للباقي..

**حلاتي سلطان يقولي خالتي** · 06-01-2010, 09:59 PM

شكرآآ يا الغلا

asoOolah · 06-01-2010, 10:21 PM

روعه يالغلا ..

~~!؛"؛!اقــــدار الزمــــان!؛"؛!~~ · 06-03-2010, 06:59 PM

حيااااااااااااااااكم الله..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الله يهنيني فيك ~~~~ زفة من عالم الرومانسية ~~	•˚ نســمة الحيــآة ˚•	منتدى الزفات	4	09-30-2011 12:50 PM
زفة الله يهنيك فيني والله يهنيني فيك	ام جلال الدوسري	تجهيزات العروس	3	04-15-2011 04:50 AM
طله العروس ( الله يهنيني ) بصوت سارة بدون موسيقى	سـومـة	منتدى الزفات	13	07-31-2010 03:09 AM
اجدد و احلى و اروع روايات الروايات رواية رعب ، احسن رواية رعب مخيفة جدا	وردشان	منتدى القصص و الروايات	1	09-22-2009 08:06 AM